En Dag för all Lüüd in‘t Land
Dat weer dat Motto an’n 3. Juli 2022 in dat schöne Frielichtmuseum in Molfsee – un de Heimatbund Landschaft Eiderstedt weer dorbi! Na veer Johr – toletzt 2018 – kunn dat wedder losgahn mit den „Tag der Schleswig-Holsteiner“, organiseert vun unsen Dackverband, den Sleswig-Holsteenschen Heimatbund.
Buten un binnen rundum de Winkelschüün un överall in’t Gelänn vun dat Museum weer den ganzen Dag wat los: Musik un Danz, en Reed vun den SHHB-Präsidenten Peter Stoltenberg un ok en vun de Landdags-Vizepräsidentin Eka von Kalben, en wunnerboren plattdüütschen Gottsdeenst mit Paster Peter Schuchardt, Öllermann vun „Plattdüütsch in de Kark“ un noch veel mehr. Op Düütsch un op Ukrainisch weer dat Fredensleed „Sag mir, wo die Blumen sind“ to hören.
De Eiderstedters harrn en feinen Stand direkt bi all de Plattdüütschen. De Spraak, unse Spraak, speel denn ok en grote Rull den ganzen Dag över. Un all de Lüüd kunnen veel över unse schöne Halfinsel to weten kriegen. Bi en Glücksrad kregen de Lüüd Fragen över Eiderstedt un kunnen ok wat winnen. Dat keem allerbest an! Un bi dat Eiderstedt-Puzzle harrn de Lüüd ok veel Spaaß. Is nich so eenfach: Wo liggt Westerhever un wo liggt Welt?
Unse Vereen harr sien Drachtenlüüd dorbi – wat fein, den ganzen Dag harrn de Lüüd en smucke Fotomotiv!
In twee Johr geiht dat wedder los – un de Eiderstedters sünd denn ok geern nochmal dorbi.
